Gen 33 | WSK | STEP | Jacob Esau ko kari 400 arungak taiwaram se arigam. Ale noko nuwus ilagala Leah, Rachel, se ko ura dungan imet ilagala mu nunga kuriang nomoke nomoke nungaram se arungu sanami gilingiman.

Genesis 33

Jacob Esau arigam

1 Jacob Esau ko kari 400 arungak taiwaram se arigam. Ale noko nuwus ilagala Leah, Rachel, se ko ura dungan imet ilagala mu nunga kuriang nomoke nomoke nungaram se arungu sanami gilingiman. 2 Nu ko ura saonga imet nunga kuriang arungu gira nunga awuram. Ale Leah ko kuriang arungu mu kusumuri awuram, ale Rachel ko namar Joseph ilak mu nukum te. 3 Se Jacob kota giram ko laun kote nama aratu se tom 7 ko tararam.

4 Bare Esau naguram arigokko nunguningkiri tairam, ale iluwam yasaram ale kol misikiram. Ale ilagala wete niakasan. 5 Ale Esau loagaram gurugam ale imet nunga kuriang arungak nungarkam ale isuam, “Mu arika kariimet nikerak a?” mam.

Se Jacob balam, “Aga biya, Kaem kota munan ningo ani aisam ale ani nika ura kari kuriang imi ani aisam.”

6 Se ura saonga imet ilagala nunga kuriang ago taiman Esau ko koma dugu te tara gilingiman. 7 Se udagi Leah ko kuriang arungu taiman taraman, se udagi nunguning Joseph ko nuam Rachel ilak taiman taraman.

8 Se Esau balam, “Se ani sipsip belelek mel motam bibiya wore lage te nungarki se tairem mu awuk a?”

Se Jacob balam, “O aga biya, mu ni te ani ago ko gemang nungerukko!”

9 Bare Esau balam, “Aga uria, aninga mel terong ma la pa! Nika mel mu am ilupko.”

10 Bare Jacob balam, “Ni ani ago ko gemang nungeram agi mu, aninga munan sumu am giko. Ani nika kema arigem, mu ani Kaem koma arigem iwita, mu awuk, ni ani ago ko gemang nungeram. 11 Se ni aninga munan kisem mu giko. Kaem munan ningo beteram ale mel suen biya ani aisam, se aitak ani aga mel terong ma la.” Jacob uwuta balam ale noko munan Esau tuokko wore am ko sail tagiram, se Esau giam.

12 Se Esau balam, “Namanakko. Ani nikerak namirikko.”

13 Bare Jacob nu maonam, “Aga biya, ni ikisam, kuriang nosokel mena. Se betela ani sipsip bulmakau nunga kuriang ago wore nunga ikia aga moso tala. Ani nunga diruwurek tom suwanta ko arungu aolak iluwekko mu nuna kuemonko. 14 Aga biya, ni gir namar se ani kewom karikko. Ani bulmakau sipsip girimon, se nononga aolak ilusan te se kuriang nunga aolak ilusan te ani nogowom karikko, nama Seir asele karkikko.”

15 Se Esau balam, “Aninga kari sang awu kisek se lage ka kasurmon kerak taimonko,” mam.

Bare Jacob balam, “Aga biya, ni ani ago ko yawarakala pa. Bare aninga ura kari mu terong mam.”

16 Se tom mu te Esau peleram Seir namaram. 17 Bare Jacob mu Succoth namaram. Ale nu kota ko kawam kaolam, ale bulmakau sipsip nunga sasal ago kaolam. Umutang te sor mu nup beteman Succoth maman. ^{▼▼Gen 33:17 Nup Succoth ko nunguning mu “kawam sasal gotektek”.}

18 Jacob Mesopotamia beteram ale peleram tairam mu nu tai Shechem wonong Canaan sor te aratam. Ale ko kuwim Shechem wonong ko duap te nungam. 19 Nu ali mu manga silver 100 te diaram, Hamor, Shechem ko nuet, wore ko kuriang nongote ali diaram. 20 Ale sor mu te kuwim bo Kaem te tama tua ko mu galaram. Ale sor mu nup beteram El Elohe Israel mam. ^{▼▼Gen 33:20 Nup El Elohe Israel mu ko nunguning mu “Kaem, Israel nunga Kaem”.}